ብሬክስሩ ትሬዲንግ አ.ማ. ለፓርላማ ሴት ተመራጭ ኮከስ አባላት የሁለት ቀናት ስልጠና ሰጠ!

ጥቅምት 27፣ 2015 ዓ.ም.፤ በሕዝብ ተወካዮች ምክር ቤት ለሴት ተመራጭ ኮከስ አባላት በብሬክስሩ ትሬዲንግ አክሲዮን ማህበር ለሁለት ቀናት ሲሰጥ የነበረው ተግባር ተኮር ስልጠና ተጠናቋል።

ሀያል ሂደት በሚል ጥቅል ርዕስ የሚጠራውን ስልጠና በስምንት ክፍሎች ከፋፍለው ለሁለት ቀናት ሲሰጡ የቆዩት በከፍተኛ የስልጠና ክህሎታቸው የታወቁት የብሬክስሩ ትሬዲንግ አ.ማ. ባለሞያዎች ናቸው።

አሰልጣኞቹ ይሄንን በግል ስብዕና ላይ ያተኮረ ስልጠና ቁጥራቸው ከ150 በላይ ለሚሆኑ ሴት የሕዝብ ተወካዮች የሰጡት የድርጊት ህልም መስራት (ማለም)፣ የግብ ትልም፣ የድርጊት ዕቅድና የአይምሮ ባንክ በሚሉ አበይት ርዕሶች ሥር በመከፋፈል ነው።

ሰፋ ያለውን ስልጠናና ትምሕርት ሲወስዱ የቆዩት ሴት የምክር ቤት አባላት አስተያየታቸውን የሰጡት፣ "ስልጠናው አስፈላጊና ሁሉም የሕ/ሰብ ክፍል ሊወስደው ወይም ሊሰለጥንበት የሚገባ፣" በሚል ጥቅል ሃሳብ ነው።

ስልጠናው በቀጥታ ወደ ተግባር መግባት የሚያስችልና ትክክለኛውን የውስጥ አቅም እንዴት አውጥቶ መጠቀም እንደሚቻል እውቀት ያስጨበጠ መሆኑን የገለጹት ሰልጣኞቹ ስልጠናውን ለሰጡት አሰልጣኞች ላቅ ያለ ምስጋና አቅርበውላቸዋል።

አሰልጣኞቹም በበኩላቸው በቀጣይም ድጋፋቸው እንደማይለይና ከዚህ በኋላ "የንግግር ሳይሆን የተግባር ሰው እንሁን" በሚል መልእክታቸውን አስተላልፈዋል።

ስልጠናው በተሳካ ሁኔታ ይጠናቀቅ ዘንድ ትብብር ያደረጉትን ግለሰቦች፣ መንግስታዊ አካላትና የድርጅቱን ሰራተኞች ብሬክስሩ ትሬዲንግ አ.ማ ያመሰግናል።